“Бадрах Энержи” ХХК Монгол Улсын их сургуулиудтай хамтран газар доор уусган олборлох технологийн цуврал сургалт, семинарыг зохион байгуулж байна

“Бадрах Энержи” ХХК, Орано Уул уурхайн коллеж, Монгол Улсын Их Сургууль болон Шинжлэх Ухаан Технологийн Их Сургууль хамтран газар доор уусган олборлох технологийн талаар мэдлэг олгох зорилго бүхий цуврал сургалт, семинарыг 2025 онд зохион байгуулахаар төлөвлөснөөс “Газар доор уусган олборлох технологиор олборлох боломжтой ордын геологийн тогтоц, онцлог” сэдэвт эхний сургалт 3 дугаар сарын 14-ний өдөр эхэллээ.

Энэ жил зохиогдох сургалт, семинар нийт 5 модулаас бүрдэх юм байна. Монгол Улсын Их Сургууль дээр зохион байгуулагдаж буй тус сургалтыг нээж МУИС,  ШУТИС болон “Бадрах Энержи” ХХК-ийн удирдлага үг хэлэн, оролцож байгаа багш, оюутнуудад амжилт хүслээ.

Дашрамд дурдахад “Бадрах Энержи” ХХК нь МУИС, ШУТИС болон Сайншанд дахь Политехникийн коллежтой хамтын ажиллагааны санамж бичгийг 2023 онд тус тус байгуулсан бөгөөд хамтын ажиллагааны хүрээнд төлөвлөсөн ажлууд ийнхүү биеллээ олж байна.

Тухайлбал, өнгөрөгч 2024 онд мөн “Бадрах Энержи” компани, Орано уул уурхайн коллежийн мэргэжилтнүүдийн удирдан зохион байгуулсан манай улсад шинэ тутам хөгжиж байгаа ураны салбар, газар доор уусган олборлох технологийн талаарх лекц, семинарт дээрх хоёр сургуулийн 30 гаруй багш, оюутан хамрагдсан билээ.