УИХ-ын хаврын ээлжит чуулган ирэх даваа гарагт буюу энэ гуравдугаар сарын 17-нд эхэлнэ.

Жил бүрийн хаврын чуулган дөрөвдүгээр сараас эхэлдэг ч энэ удаад эрт эхлүүлж буй нь хэлэлцэх асуудлын тоо олон, цар хүрээ ч том гэлцэж байна.
Тодруулбал, чуулганы эхэнд Ерөнхий сайд Л.Оюун-Эрдэнэ мэдээлэл хийхээр төлөвлөсөн гэнэ. Засгийн газар энэ лхагва гарагт хуралдахдаа Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай Монгол Улсын Засгийн газар болон БНХАУ-ын Засгийн газар хоорондын хэлэлцээрийг соёрхон батлах тухай хуулийн төслийг УИХ-д өргөн мэдүүлэхээр болсон билээ. 

Томоохон 14 төсөл хэрэгжүүлэхээр зарлаад буй хамтарсан Засгийн газрын тэргүүн дээрх төслийнхөө талаар УИХ-ын гишүүдэд дэлгэрэнгүй танилцуулахаар бэлтгэж буй бололтой. Энэ нь улс төр, нийгэм, хоёр улсын анхаарлын төвд буй томоохон төсөл юм.

Мөн УИХ-ын гишүүн Д.Цогтбаатарыг эргүүлэн татах үндэслэл бүрдсэн тул анхны 126 гишүүнтэй парламентаас нэг гишүүн сугарах нь тодорхой болжээ.  Д.Цогтбаатар гишүүн энэ долоо хоногт яллагдсан тогтоолоо шүүхээс гардан авсан тухай мэдээлэл цацагдсан юм.

УИХ-ын гишүүнийг чөлөөлдөг гурван үндэслэл байдаг. Нэгдүгээрт, нас барсан тохиолдолд, хоёрдугаарт, өөрийн хүсэлтээр чөлөөлөгдөх, гуравдугаарт, шүүхээс гэм буруутай нь тогтоогдсон үед чөлөөлдөг. 

Иймд Д.Цогтбаатар гишүүнд шүүхийн тогтоол гардуулсан тул түүний бүрэн эрх дуусгавар болж сонгогдсон тойрогт нь нөхөн сонгууль болох бололтой. Тэрбээр УИХ-ын сонгуульд АН-аас нэр дэвшин Хангайн бүсээс сонгогдсон юм. Энэ хаврын чуулган эхэлмэгц УИХ нэг гишүүнээ явуулж, Хангайн бүсэд улс төрийн намууд нөхөн сонгуульд нэр дэвшигчдээ сойж нэлээд бужигнахаар болж байна.